“Ди Би Эм Лизинг” ХХК-ийн холбогдох албан тушаалтнууд төмөр замын салбарын хэрэгжиж буй төслүүдийн санхүүжилтийн хэрэгцээ, боломжийн талаар Зам, тээврийн хөгжлийн яамны Төмөр замын тээврийн бодлого зохицуулалтын газрын удирдлагатай  уулзаж санал солилцлоо.

Монгол Улсын Засгийн газраас хэрэгжүүлж буй томоохон төслүүдийн хүрээнд хил дамнасан төмөр замын бүтээн байгуулалтыг эрчимжүүлж буй нь төмөр замын нэвтрүүлэх хурдыг нэмэгдүүлж байна. Төмөр замын тээвэрлэлт өсөн нэмэгдэхийн хэрээр хөдлөх бүрэлдэхүүн (зүтгүүр, вагон)-ий тоо хэмжээг нэмэгдүүлэх хэрэгцээ шаардлага үүсч байгаа бөгөөд эхний ээлжинд Гашуунсухайт–Ганцмод боомт болон Баганхангай–Хөшигийн хөндий чиглэлийн төмөр замын тээвэрлэлтийн  зүтгүүр, вагон худалдан авах, ачаа тээврийн төвлөрсөн терминал зэрэг дунд хугацаанд хэрэгжих томоохон бүтээн байгуулалтад санхүүгийн түрээсээр хамтран ажиллах боломж нээлттэй байгааг талууд онцлов.

Түүнчлэн “Монголын Төмөр зам” ТӨХК-ийн хөдлөх бүрэлдэхүүн болон тоног төхөөрөмжийн шинэчлэлд ойрын хугацаанд 200 сая ам.доллар орчим санхүүжилтийн хэрэгцээ үүсч байгаа бөгөөд “Ди Би Эм лизинг” ХХК-ийн хувьд тодорхой хэсгийг хөнгөлөлттэй эх үүсвэр татан төвлөрүүлэх замаар санхүүгийн түрээсээр хангах боломжийг судлан ажиллахаар болов.  Эдийн засгийн үр өгөөж бүхий хүчин чадал сайтай хөдлөх бүрэлдэхүүний тоо хэмжээг нэмэгдүүлэхэд уян хатан нөхцөлөөр санхүүгийн түрээсийн үйлчилгээ үзүүлэх нь төмөр замын компаниудад их хэмжээний хөрөнгө оруулалт шаардахгүйгээр хөдлөх бүрэлдэхүүн худалдан авах боломжийг олгохоос гадна Монгол улсын эдийн засагт томоохон өсөлтийг авчрах боломжтой юм.